Bermeo Tuna World Capitalek bereaitorpen instituzionala indartzen duonura publikoko deklarazioarekineta REECEAn sartzearekin

Bi mugarri horiek elkarteak interes orokorrari egiten dion ekarpena bermatzen dute, eta aliantzak, ezagutza eta berrikuntza sustatzeko gaitasuna indartzen dute atunaren balio-katean.

Bermeo, 2026ko abuztuaren 12a. Bermeo Tuna World Capital Elkarteak (Bermeo Tuna) bi mugarri berri lortu ditu bere sendotze instituzionalean: Eusko Jaurlaritzak onura publikoko elkarte gisa aitortzea eta Ekonomia Urdinerako Ezagutza Guneen Espainiako Sarean (REECEA) sartzea.

Onura publikoko deklarazioak aitortzen du elkarteak garatzen dituen helburuek eta jarduerek interes orokorrari eta guztion onerako laguntzen diotela. Aitorpen horrek itsas baliabideen iraunkortasunaren, berrikuntzaren, ezagutzaren sorreraren eta transferentziaren eta atunaren balio-kateari lotutako garapen ekonomiko eta sozialaren alde egindako lana bermatzen du.

Estatus berriak, gainera, Bermeo Tunak aliantzak ezartzeko eta finantzaketa publiko eta pribatua interes orokorreko proiektuetara bideratzeko duen gaitasuna indartzen du. Halaber, zerga-araudian ezarritako baldintzak bete ondoren, irabazi-asmorik gabeko erakundeei aplikatu beharreko zerga-araubidea eta mezenasgorako pizgarriak eskuratzeko aukera ematen du.

Horrela, elkartutako erakunde eta entitateek egindako dohaintzek eta ekarpenek zerga-araudi bakoitzean aurreikusitako zerga-onurak jaso ahal izango dituzte.

Aitorpen horri Bermeo Tuna Ekonomia Urdinerako Ezagutza Guneen Espainiako Sarean (REECEA) sartu izana gehitu behar zaio. Sare hori Nekazaritza, Arrantza eta Elikadura Ministerioko Arrantza Idazkaritza Nagusiak onartu zuen.

REECEA etengabeko lantalde aholku-emailea da, arrantza- eta akuikultura-sektorea administracio publikoekin, enpresekin, erakunde zientifikoekin eta gizartearekin lotzeko sortua. Helburuen artean daude lankidetza sustatzea, ezagutzaren transferentzia erraztea eta proiektu berritzaileak bultzatzea, arrantzaren eta arrantzaren eraldaketa- eta merkaturatze-katearen iraunkortasun ekonomikoa, ingurumenekoa eta soziala bultzatzeko.

Horrela, Bermeo Tunak tunidoen balio-katearen esperientzia emango dio Sareari, lantaldeetan parte hartuko du eta aliantza berriak egingo ditu Estatuko beste ezagutza-gune batzuekin.

“Bi aitorpen horiek berresten dute Bermeo Tunaren lanak bazkideen interes partikularra gainditzen duela eta gizarte osoarentzat balioa sortzen duela. Enpresen, erakundeen eta jakintzaren arteko lankidetza-gune gisa dugun funtzioa indartzeko aukera ematen digute, eta aukera berriak ireki, ekonomian, gizartean eta ingurumenean eragina duten proiektuak bultzatzeko”, adierazi du Maitane Leizaola Bermeo Tuna World Capitaleko zuzendari nagusiak.

Horrela, elkarteak etapa berri bati ekingo dio, kolaboratzaile eta mezenasen oinarria indartzeko, ezagutza-sareetan duen partaidetza handitzeko eta Bermeo atunaren balio-katearen berrikuntza, jasangarritasun eta lehiakortasunerako erreferentzia-gune gisa sendotzeko.

Bermeo Tunari buruz Bermeo Tuna elkarte publiko-pribatua da, eta atunaren balio-kateari lotutako 40 enpresa, erakunde eta ezagutza-zentro baino gehiago biltzen ditu, sektorearen jasangarritasuna, berrikuntza eta nazioarteko posizionamendua bultzatzeko helburuarekin.