Bermeo Tunak Atun jasangarriaren inguruko prestakuntza- eta berrikuntza mahai bat sortu du Bermeon

Bermeo tuna World Capitalek bultzatuta, foro berriak administrazioak (Eusko Jaurlaritza eta Bizkaiko Foru Aldundia), Bermeoko Nautika Eskola eta enpresak biltzen ditu, euskal atun-sektorearen lehiakortasuna eta iraunkortasuna indartzeko

Bermeo Tuna-tik Bizkaiko Atun-Sektoreko Berrikuntzarako Prestakuntza Mahai honen sorrera bultzatu dugu, arrantzan, sustapen ekonomikoan eta prestakuntzan eskumena duten administrazio publikoetako ordezkariak (Eusko Jaurlaritza eta Bizkaiko Foru Aldundia), nazioarteko uren erauzketa-sektorea eta Bermeoko Nautika Eskolako ordezkarien arteko lankidetzarako gune gisa. Mahaiaren helburua da sektorearen joerak aztertzea, epe ertain eta luzerako erronkak diagnostikatzea eta euskal atunontzien ekosistemaren lehiakortasuna eta iraunkortasuna indartzeko lehentasunezko ekintza-ildoak zehaztea. Ekosistema horrek Bermeon du nodo nagusia.

Mahaia eratzeko bilkura urriaren 23an egin zen, eta horretan parte hartzen duten eragile guztiek atunontzi izoztaileen itsas-arrantzako prestakuntza hobetzeko, belaunaldien arteko erreleboari aurre egiteko eta sektorearen berrikuntza eta ospea indartzeko duten borondatea egiaztatzeko balio izan zuen, Bermeo Tunak eragile egituratzaile gisa koordinatuta.

Parte-hartzaileek oso positibotzat eta garrantzitsutzat jo dute ekimena, sektorearen iraunkortasunaren etorkizuna bultzatzeko.

“Bermeo arrantzaren eta hegaluzearen eta hegalaburraren eraldaketa iraunkorraren zerbitzura dagoen prestakuntza- eta berrikuntza-zentro espezializatu bihurtzea estrategikoa da, tokiko sustraiak dituen baina eragin globala duen industrian liderrak izaten jarraitzeko. Gainera, horrelako ekimenek baxurako arrantzaren sektorea mantentzen eta jendea erakartzen ere lagundu dezakete, kritikoa baita tokiko hornikuntza-katearentzat eta Bermeoko itsas nortasuna babesteko “, adierazi zuen Maitane Leizaola Bermeo Tuna World Capitaleko zuzendari nagusiak.

Mahaia lan-foro egonkor gisa sortu zen, atunaren balio-katea ordezkatzen duten hamabost agente biltzen dituena, administrazioak, enpresa armadoreak eta prestakuntza-zentroak barne.

Prozesuak aurrera jarraituko du, eta datozen hilabeteetan beste bi lan-saio egingo dira. Saio horietan, erronka estrategikoak, ekintza-lehentasunak eta mahaiaren gobernantza-eredua zehaztuko dira, euskal atun-sektorearen lidergoa eta jasangarritasun globalari egiten dion ekarpena indartzeko.
Bermeo Tuna World Capitaletik koordinatzaile eta erakundeen topagune gisa jardungo dugu, eta mahaiaren ondorioak eta proposamenak hezkuntza-, prestakuntza- eta arrantza-gaietan eskumena duten erakundeetara bideratuko ditugu.